ທະນາຄານຮ່ວມທຸລະກິດລາວຫວຽດ ໄດ້ສຳເລັດການເຊື່ອມໂຍງບັດ ATM ກັບ 28 ທະນາຄານທີ່ເປັນສະມາຊິກ BanknetVN ຢູ່ ສສ ຫວຽດນາມ.
ວັນທີ 25/09/2014, ຢູ່ນະຄອນຫລວງວຽງຈັນ, ສປປ ລາວ, ທະນາຄານຮ່ວມທຸລະກິດລາວຫວຽດ (LaoVietBank) ແລະ ບໍລິສັດ ຮຸ້ນສ່ວນເຊື່ອມໂຍງການເງິນແຫງຊາດຫວຽດນາມ (Banknet VN) ໄດ້ຈັດງານຕັດແຖບຜາເປີດພິທີ ແລະ ນຳເອົາລະບົບຊຳລະສະສາງບັດ ATM ຂອງ LaoVietBank ເຊື່ອມຕໍ່ກັບລະບົບຂອງ BanknetVN.
ໂດຍມີການເຂົ້າຮ່ວມ ແລະ ຮັບຟັງຂອງທ່ານ ເວືອງ ດີງ ເຮ້- ກຳມະການສູນກາງພັກຄອມມູນິດຫວຽດນາມ, ຫົວໜ້າຄະນະ ເສດຖະກິດສູນກາງ ສສ ຫວຽດນາມ; ທ່ານ ຫງວຽນ ແມັ້ງ ຮຸງ - ເອກອັກຄະລັກຖະທູດວິສາມັນຜູ້ມີອຳນາດເຕັມແຫ່ງ ສສ ຫວຽດນາມ ປະຈຳ ສປປ ລາວ; ຕາງໜ້າຄະນະນຳຂອງ ທະນາຄານແຫ່ງ ສປປ ລາວ; ຄະນະນຳຂອງສອງ ທະນາຄານແມ່ BIDV ແລະ BCEL, ບັນດາທະນາຄານທຸລະກິດ ພ້ອມດວ້ຍລູກຄ້າ ແລະ ຄູ່ຮ່ວມທຸລະກິດຂອງ LaoVietBank ໄດ້ເຂົ້າຮ່ວມຢ່າງພ້ອມພຽງ.
ກ່າວປາໄສໃນພິທີຕັດແຖບຜ້າ, ທ່ານ ຫງວຽນ ກວາງ ມິງ - ຜູ້ອຳນວຍການ Banknet ຫວຽດນາມ ໄດ້ໃຫ້ຮູ້ວ່າ: “ ການເຊື່ອມຕໍ່ລະບົບຊຳລະສະສາງຜ່ານບັດ ATM ລະຫວ່າງ LaoVietBank ແລະ Banknetvn ແມ່ນເຫດການໜື່ງທີ່ສຳຄັນເຊິ່ງເຮັດໃຫ້ LaoVietBank ກາຍເປັນທະນາຄານທຳອິດ ທີ່ເຊື່ອມໂຍງກັບລະບົບການຊຳລະສະສາງຜ່ານບັດຊຳລະຢູ່ຕ່າງປະເທດ. ເຊິ່ງນີ້ເປັນຕົ້ນແບບທີ່ຈະເຮັດໃຫ້ບັນດາທະນາຄານທຸລະກິດຢູ່ລາວ ສາມາດເຊື່ອມໂຍງອອກສູ່ຕ່າງປະເທດ, ຊ່ວຍເພີ່ມຄວາມສາມາດໃນການສະໜອງບໍລິການທີ່ມີຄວາມສະດວກວ່ອງໄວໃຫ້ແກ່ບັນດາຜູ້ຊົມໃຊ້ລະຫວ່າງ 02 ປະເທດ, ເປີດກວ້າງຕາໜ່າງການຊຳລະ, ກ້າວໄປສູ່ເປົ້າໝາຍການເຂົ້າຮ່ວມ, ເຊື່ອມໂຍງກັບທົ່ວໂລກ”
ລະບົບການເຊື່ອມໂຍງ LaoVietBank – Banknet ເມື່ອໄດ້ນຳເຂົ້າສູ່ການບໍລິການຈະສ້າງຄວາມສະດວກ, ວ່ອງໄວໃຫ້ແກ່ລູກຄ້າທີ່ຊົມໃຊ້ບັດ ATM ຂອງ LaoVietBank ກໍຄືບັນດາລູກຄ້າຂອງອີກ 28 ທະນາຄານທີ່ເປັນສະມາຊິກຂອງ Banknet ສາມາດດຳເນີນການເຄື່ອນໄຫວທຸລະກຳຢູ່ໃນທຸກໆຕູ້ ATM ໃນທົ່ວດິນແດນຂອງ ສປປ ລາວ ແລະ ສສ ຫວຽດນາມ. ການເຊື່ອມຕໍ່ຍັງຊ່ວຍໃຫ້ປະຢັດເວລາໃນການໂອນເງິນຈາກ ສປປ ລາວໄປ ສສ ຫວຽດນາມ ແລະ ຈາກ ສສ ຫວຽດນາມ ມາ ສປປ ລາວ. ພາຍຫລັງເຊື່ອມໂຍງລະບົບສຳເລັດລູກຄ້າສາມາດນຳໃຊ້ບັດ ATM ເພື່ອດຳເນີນການຖອນເງິນ ຫລື ຊຳລະຜ່ານເຄື່ອງຮູດເງິນ POS ໄດ້ທຸກໆເວລາໂດຍບໍ່ເສຍເວລາໃນການໂອນເງິນຄືກັນກັບແຕ່ກ່ອນ. ປະຢັດທັງເວລາ ແລະ ຄ່າໃຊ້ຈ່າຍໃນການໂອນເງິນໃຫ້ແກ່ລູກຄ້າ.
ທ່ານ ເຈີນ ລຸກ ລາງ - ຮອງຜູ້ອຳນວຍການ BIDV, ປະທານສະພາບໍລິຫານ LaoVietBank ໄດ້ໃຫ້ຮູ້ວ່າ: “ນັບແຕ່ມື້ທີ່ໄດ້ສ້າງຕັ້ງແຕ່ປີ 1999 ຈົນເຖິງປັດຈຸບັນ, LaoVietBank ສາມາດປະຕິບັດຫລ້ອນໜ້າທີ່ຢ່າງດີເດັ່ນໃນການເປັນຫົວໜ່ວຍແຖວໜ້າໃນການເຊື່ອມຕ໋ການຊຳລະສະສາງ, ແລກປ່ຽນເງິນຕາຂອງສອງຊາດ ລາວ ຫວຽດນາມ, ເປັນຂົວຕໍ່ໃຫ້ແກ່ບັນດາສະມາຄົມນັກທຸລະກິດຂອງສອງປະເທດ ຊຸກຍູ້ການຮ່ວມມືທາງເສດຖະກິດ, ການລົງທຶນ, ການຄ້າ ແລະ ທ່ອງທ່ຽວ. ໂດຍໄດ້ຮັບການຊ້ວຍເຫຼືອສະໜັບສະໜູນຢ່າງເຂັ້ມແຂັງ ແລະ ຮອບດ້ານຈາກ BIDV. ລະບົບການຊຳລະຂອງ LaoVietBank ໄດ້ຂ້າມຜ່ານເຖິງ 03 ໄລຍະແຫ່ງການພັດທະນາ: ໄລຍະທີ 1 ໄລຍະການເຊື່ອມໂຍງພື້ນຖານ. ໄລຍະທີ 2 ການເຊື່ອມໂຍງລະບົບ Online ລະຫວ່າງ LaoVietBank ຢູ່ ສປປ ລາວ ແລະ ບັນດາສາຂາຢູ່ ສສ ຫວຽດນາມ ພາຍຫຼັງທີ່ໄດ້ສຳເລັດການຜັນຂະຫຍາຍລະບົບເຕັກໂນໂລຊີ Corebanking ທີ່ທັນສະໄໝລະດັບແຖວໜ້າຢູ່ ສປປ ລາວ. ໄລຍະທີ 3, LaoVietBank ກໍ່ໄດ້ ແລະ ພວມດຳເນີນການຊຸກຍູ້ການລົງທຶນ, ນຳໃຊ້ນຳໃຊ້ເຕັກໂນໂລຊີຂໍ້ມູນຂ່າວສານພິເສດ ແລະ ສຳເລັດຜົນໃນການເຊື່ອມໂຍງໂດຍກົງກັບອີກ 28 ທະນາຄານທີ່ເປັນສະມາຊິກຂອງລະບົບ BanknetVN, ສາມາດສະໜອງບັນດາຜະລິດຕະພັນທະນາຄານແບບລາຍຍ່ອຍໄດ້ຫລາກຫລາຍກວ່າເກົ່າ. ບົນພື້ນຖານດ້ານເຕັກໂນໂລຊີທີ່ມີຢູ່ໃນປັດຈຸບັນ LaoVietBank ແມ່ນມີຄວາມອາດສາມາດສູງທີ່ຈະເຊື່ອມໂຍງກັບລະບົບການຊຳລະດ້ວຍບັດທີ່ມີຂະໜາດໃຫຍ່ເຊັ່ນ Visa, Master …” .
ໃນພິທິດັ່ງກ່າວ, ທ່ານ ເວືອງ ດີງ ເຮ້ - ຫົວໜ້າຄະນະເສດຖະກິດສູນກາງ ສສ ຫວຽດນາມ ກາຍເປັນລູກຄ້າຜູ້ທຳອິດທີ່ປະຕິບັດທຸລະກຳໄດ້ຢ່າງສຳເລັດຜ່ານຕູ້ ATM ຂອງ LaoVietBank ໂດຍການນຳໃຊ້ບັດທີ່ BIDV ໄດ້ຈຳໜ່າຍໃຫ້.
ດວ້ຍຄ່າທຳນຽມພຽງແຕ່ 1/6 ຂອງຄ່າທຳນຽມໃນການຊຳລະດວ້ຍຮູບແບບການໂອນເງິນສາກົນຕາມທຳນຽມທົ່ວໄປ ດັ່ງນັ້ນຕາມຄາດຄະເນການສຳເລັດເຊື່ອມໂຍງລະຫວ່າງ LaoVietBank ແລະ Banknet ຈະສາມາດປະຢັດຄ່າທຳນຽມໃນການໂອນເງິນຂອງ ກວ່າ 30 ລ້ານລູກຄ້າຂອງ LaoVietBank ແລະ Banknet ຄິດເປັນມູນຄ່າຫລາຍຕື້ດົ່ງ.
ການຜັນຂະຫຍາຍສຳເລັດລະບົບຊຳລະສະສາງບັດ ATM ລະຫວ່າງ LaoVietBank ແລະ Banknetvn ເປັນຂີດໝາຍແຫ່ງການຮ່ວມມື, ການເຂົ້າຮ່ວມລະຫວ່າງລະບົບທະນາຄານສອງປະເທດ ສປປ ລາວ ແລະ ສສ ຫວຽດນາມ, ປະກອບສ່ວນເຂົ້າໃນການເຊື່ອມຕໍ່ພື້ນຖານເສດຖະກິດ ແລະ ຊຸກຍູ້ ສາຍພົວ ພັນຮ່ວມມືເສດຖະກິດລະຫວ່າງສອງຊາດລາວ - ຫວຽດນາມ ໃຫ້ນັບມື້ນັບເຕີບໃຫຍ່ຂະຫຍາຍຕົວ.
ຂໍ້ມູນລະອຽດກະລູນາຕິດຕໍ່: ທະນາຄານຮ່ວມທຸລະກິດລາວ-ຫວຽດ.